Ata Ako Pusuanon

tuminasok, ruminurubrub
mga gapo, sa kublit
liminatub.

lanit, girabo
an daghan
biyong nagtutubtub.

natatakot, naghahapot
pagduduwa-duwa
an kapot-kapot

sinasayud, mga ngaran
mantang linalatigo
nin uran.

nagtatakig an
daga, uminaskad
an salog na dakula.

"ina, uya an
s'imong aki!"

"aki, uya an
s'imong ina!"

kugusa man
ta biyong
nagtatakig,

ta an paros
mayo na, uminuli
na sa langit.


1-29-10

Ipinaskil ni Jusan Misolas sa 8:45 AM 0 (mga) komento  

close...
open..

itinukdo ninda
sakong kuguson
an duros,

close...
open...

asin kun
nuarin
bubutasan ini.

1-3-10

Ipinaskil ni Jusan Misolas sa 9:03 AM 0 (mga) komento  

hale sa
sarong
malaen na
pangiturugan.

nahimatang akong
bagol
an intero
kong mga kamot.

pinutol
daa
ni kamatayan
an mga ini
habang
dinudulagan ko
an saiyang matarom
na kawit.

asin sa sakuyang
pagbungkaras
hale sa higdaan
kapot ko
an sakuyang
panurat na
patos nin dugo.

1-3-10

Ipinaskil ni Jusan Misolas sa 9:02 AM 0 (mga) komento  

Namundag akong
pigdudupaan
an mga gapo
na igwang
ngimot asin lawog,

asin ngunyan
nagimata akong
rinaratak
an mga ini,

mantang kinukugos
an duros
na haloy ko nang
dae nahihiling.

12-14-09

Ipinaskil ni Jusan Misolas sa 9:05 AM 0 (mga) komento  

sa kada sarong kurit
na binabayli
kan sakuyang mga kamot,

sarong ritwal
an sakuyang inaatang
sa diyos nin kagadanan.

sarong gawe nin paggadan
asin pagratak, an sakuyang
padikit-dikit na hinahaman.

na minakawsa kan pagbulos
nin dugo
hale sa sakuyang panurat.

12-9-09

Ipinaskil ni Jusan Misolas sa 9:07 AM 0 (mga) komento  

Ipinaskil ni Jusan Misolas sa 9:14 AM 0 (mga) komento  

Ipinaskil ni Jusan Misolas sa 9:16 AM 0 (mga) komento