Ata Ako Pusuanon

Pinorbaran kong ikurit an lawog ni Kagurangnan,
pero maski anong pirit, iba an sakuyang nahahaman.

An nahihimo ko, iyo an sakuyang lawog,
itum na buhok, mga matang turuhok,
baralud na ngabil na pano pagkatakot.

Pinorbaran kong ikurit an lawog ni Kagurangnan,
pero maski anong pirit, iba an sakuyang nahahaman.

An nahihimo ko iyo an sakuyang lawog,
an sakuyang dungo, pirok, kiray,talinga,
nakaduko, nagkukurahaw na dae ko taposon an obra.


02-25-10

Ipinaskil ni Jusan Misolas sa 1:36 AM 0 (mga) komento  

minaisog an gabos na bagay,

an danaw
an salog
an paros
an daga
an kalayo
an mga gapo
an mga baybay
an mga bulkan
an mga kahoy
an mga sirum
an mga halas
an mga burubuaya
an mga ulod
an mga rebulto
an mga tawo

ta kun banggi
pigdudurog kan Diyos an saldang.


02-25-10

Ipinaskil ni Jusan Misolas sa 1:36 AM 0 (mga) komento  

Naputol su ikog
kan
tabili,


naipitkaya
sabisagrakanpintuan.


N
a
r
a
t
a
sa
salog.


Biyo an
pag-ikol. S i n u s u s o g an
may kagsadiri.

Dae na naghaloy
naotsan ini.

Nag-urom su tabili,
naghibi, igwang pigmumuya-muya
sa paros.

Pagkabanggi, naggibo ako
nin hararom na kalot, dangan
luhay-luhay na inilubong su ikog.

Makalihis an semana
nakahiling ako nin tabili,
igwa nin pila an ikog.

2-10-10

Ipinaskil ni Jusan Misolas sa 1:37 AM 0 (mga) komento  

-para sa kapahingaloan kan aldaw na napatud an tamsi:August 6, 2009
Kan sarong aldaw, kinapotan
mo an sakuyang abaga.

Dae ako nagsalingoy
ta aram kong
ika idto.

Minate ko na lang an himbong
kan saimong mga muro, mantang
ini nagwawarak, sa bilog
kong hawak.

Natuog ako
sa sakuyang kinamumugtakan, pirit
na pinupugol an daeng untok na
paglatob kan sakuyang daghan.

Minamate an
ganot na minaturo, hale
sa sakuyang liog.

Dinadangog an
himno, na binibilog
kan sakuyang hinangos.

Sa sakuyang pagsalingoy
nahiling ko an saldang na
pasulnop, hatod-hatod

an malipot na duros na
naghapiyap sa sakuyang lawog.



2-08-10

Ipinaskil ni Jusan Misolas sa 1:39 AM 0 (mga) komento