Ata Ako Pusuanon

Hilnga
kun
papano
an

pagrugon
kan
sakong
mga
berso.

Kun
papano
piglalaag
an
mga
pagmate
sa
mga
haralipot
na
tataramon. Kun
papano
ko
pinapano
nin
kahulugan
an
duwa
o
sarong
letra.
Ta

puon
kan
aldaw
na
idto

pig-aantisiparan
ko
naman
an
paglapiga kan sakong pagal nang panurat.

4-23-10

Ipinaskil ni Jusan Misolas sa 1:25 AM 0 (mga) komento  

Ama!,

hale sa mga tinao ninda
sakong hirog:

sa payo, kamot,
bitis asin tulak,

tuminambo
an mga alang
na awot,

na nagkawsa
nin dae masayod
na pagtakig
kan saindang mga kalag.


4-19-10

Ipinaskil ni Jusan Misolas sa 1:33 AM 0 (mga) komento  

mayo siyang pakiaram sa
sa maski ano paman,

sa batok kan mga ayam
sa tugraik kan orig sa tangkal
sa naghahalhal nang damulag
sa mga nagrararatang mga gamgam
sa mga nagrurulutaw na sira
sa pagruluwasan kan mga halas
sa buwayang nagin nang gapo
sa pag-atake nin mga sirum sa kaharongan

sa aking nakairihi sa higdaan
sa naghihinagdan na gurang
sa parainom na inaatake nin helang
sa ansudon na parapadyak
sa panos na biyo an pagsangaw

sa pagbulos nin daing labing ganot
sa mga nahahalang na halanohan
sa mga nagdudurugong kublit
sa dae masayod na pagtakig
sa pagsuka nin dugo
sa paglagapak nin payo sa salog

sa mga nag-iirinoman na nauli sa taragaan
sa mga nagchuchungki kun saen dyan
sa mga dae pa tapos mag-anohan
sa mga dae pa napapatorog
sa mga durog pa an ulunan habo pang butasan

sa mababaatang kasilyasan
sa daeng ontok tigab kan gripo sa sakduhan
sa dae matapos-tapos na tinampo
sa linintian nang dam

sa naggagaratak na daga
sa mga nalalapang umahan
na mga nasusulong kadlagan
sa mga naating kadagatan
sa mga nagtutugang bulkan
sa makukusog na pakol kan duros
sa daeng ontok na pagbulos kan uran
sa pagrumpag kan mga darakulang gapo

sa kaogmahan
sa kamurawayan
sa katotoohan
sa katikapohan
sa kasalan
sa kagadanan
sa rimpos nin dae masukol na katibaadan

sa saiyang kaglalang

ta an saldang ginibo
tanganing magsirang sa sirangan
dangan magsulnop sa sulnopan.

3-29-10/ 4-17-10

Ipinaskil ni Jusan Misolas sa 1:31 AM 0 (mga) komento  

Sa sarong dakulang harong, nagkakarakan
an sarong pamilya, pigbabarangaan
an sarong dakulang litson asin mga matatabang karpa.

Mantang sa saindang pamitisan, naghahalat an mga ataman
na ikos, piggigirokan an mga saindang mga tabay, pighahalat
an mga pagragrag o kun dae, pagtoron kan mga tulang asin dugi.

Dangan an mga sirum na kolor pula nagmamartsa na
pasakat sa lamesa, naghahanda nang simoton an mga
natadang mga ngima na dae pa natatrapohan kan mga katabang,
na nagsasarama pa sanang magkakan sa kusina, pigtitios
arahiton an mga tadang laman sa litson asin pirit na pigsususop
an tagok kam mga tadang payo kan karpang dae nahiro. Nagraralanab an

saindang mga ngabil mantang nagtitilamtilam. Pigpapasalamatan
an Diyos sa kaitasan mantang piggigiromdom an saindang mga aki na
winalat sana sa kataid na harong, na dae sigurado kun nakakarakan naman.

Dae naghaloy, nagribok na an kulungan dakulang senyales na kaipuhan linoan
an mga plato asin tiponon an mga tulang asin dugi dangan ibahog sa naglalaway
nang ayam, na biyo ang pagoorag mientras nadangog su bagting kan kaldero.

Dae naghaloy, nagbatok giraray su ayam, mati na kan katabang na yaon na su kapay gurang,
na kada odto yaon tanganing maglimos nin tadang kakanon. Suya na nagluwas
an nasirong katabang, kinua an tadang tulang sa bahugan dangan pinatoron sa kapay na gurang.


04-10-10

Ipinaskil ni Jusan Misolas sa 1:20 AM 0 (mga) komento