Ata Ako Pusuanon

(-para sa kapahingaloan kan aldaw na
binutasan ko an patod na tamsi. Para sa
aldaw na rinatak kan pararawitdawit an pagkamoot
asin kagadanan. Para sa sakong musa. Para sa
aldaw kan saiyang pagkawara.)


Kun papano ko naisurat
an rawitdawit na ini,
iyan sarong misteryo
na maski nuarin dai ko masabotan.

Kun pano ako nagimata-
nagbukaras hale sa higdaan,
kinua an panurat asin pinunan
isurat an mga berso
na dawa ako, nagduduwa
kun sain naghali asin
kun sain mapasiring.

Kun papano sa sarong iglap
nasabotan an ko an
an mga kurobkotob kan
sakuyang daghan- minsan ngani
marikas, sako ining naisurat
sa paagi nin mga tataramon
na dawa ako, dai mamidbiran.

Kun papanong sa aldaw
na idto, enot kong nahiling
an mga dai nahihiling- poon
sa tawong lipod, bakunawa,
aniningal, diyos nin tukawan,
kristyanong tupa asin mga
mga linalang na dawa sa mahulyas
na pangatorogan dai ko pa nadukhayan.

Kun papano kaini pigpurisaw
an turog kong kalag mientras
nahiling an nagsisilyab na kawit
ni kamatayan. Silyab na nagpapadagos
sakong magdalagan mantang pighihimo
asin pigtatais an sakong mga tataramon
na sa maabot na panahon sakong
isasagang asin ikakalaban sa
daing ontok na alisngaw kan
paaboton na kagadanan.

Kun papano ko hinanap
an kaogmahan sa tahaw kan
dai masayod na absurdidad- poon
enot kong pagdupa sa mga gapong igwang
lawog, pagtalbong sa mga aniningal,
sa pag-uran nin gapo, pagtakig kan
daga, pag-isog kan gabos, asin
daing ontok na rimpos
nin katibaadan mantang kugos
an paros na haloy ko nang dai nahihiling.

Kun papano ko pinirit na
ikurit an lawog kan Kaglalang
asin nadangog an kurahaw niyang
orog kahalangkaw- sarong
misteryo na dai magugumlo,
maikukurit asin maisusurat.

Kun papano ko kinaon
an batag na nagpanamit sako
kan sakrot nin totoong pagkamoot
na dawa anong pirit dai na mapapara,
arog kan pagrata kan putol na ikog
kan tabili minsan ngani naumay
mawalat man giraray nin gira na sa
daing kasagkoran saiyang dadarahon.

Asin kun papano ko tataposon
an rawitdawit na ini- giraray
sarong misteryo dawa nuarin
dai ko masasabotan, an aram ko
sana dara-darahon ko sa daing
kasagkoran an gira na saimong
winalat minsan pa ngani pigratak
asin binutasan ko na ini- an huring
tamsi na minasumpay sa sako saimo.

Iyo ini an aldaw na sakong
raratakon an mga berso- hilnga
an pagrata kan sakong mga tataramon,
matea an pagal kong panurat asin dangoga
pagpundo kan mga kurobkutob kan sakong
daghan minsan ika an dahilan siring
ika man an kataposan. Hilnga ta kinukugos na
ninda daga, hilnga ta bako nang
luha an minabulos sa sakong mata- kundi
mga tataramon na padikitdikit nang
minasuway sa kublit kan pararawitdawit.

Oh musa, hilnga ta an pararawitdawit
mayo na- kinaon na kan daga mantang
pigkukurahaw an himno kan saimong pagkawara
asin ngunian kaolayaw an mga ulod na
minahinghing sa saiya- pigbabareta an
paaboton na paros asin dai na
maikurahaw an saimong ngaran-
ta an pararawitdawit nagadan asin
sa apatnapulong aldaw, giraray
na mabungakaras- kapot an
saiyang panurat na patos nin dugo.





05-13-10

Ipinaskil ni Jusan Misolas sa 12:55 AM 0 (mga) komento  

Kinaon ko si pon,
dai si hade natanyog.

Kinaon ko si bishop,
napangisi dangan
siya nagpamisa .

Kinaon ko si knight,
nagkulog su saiyang buot
asin nagpainom.

Kinaon ko si tower,
napano nin pagduwa-duwa -
nagtakig na siya.

Kinaon ko si Reyna,
mayo, tuog na siya-
ako na an gana.

5-10-10

Ipinaskil ni Jusan Misolas sa 1:11 AM 0 (mga) komento  

Chicharong baboy,
minsan pighahapot ko
an sakong sadiri:

Papano daw pignanamitan
kan talinga
an simong siram?

5-10-10

Ipinaskil ni Jusan Misolas sa 1:09 AM 0 (mga) komento  

Iyo,

halat lang...

dae.


mga simbag ko
sa tawong nagduduwa-duwa
kun turog baya talaga an Diyos.

5-10-10

Ipinaskil ni Jusan Misolas sa 1:06 AM 0 (mga) komento  

Kadakol nag-abot kadakol nawara. Pagkamoot. Kamunduan. Kogmahan. Pilosopiya. Pag-adal. Dawa ano na sana? Kaipuhan ko man sigurong magpahingalo. Dinaguso pa lang ako nin sarong unos. Asin hanggang ngunian, nagkakapa-kapa pa sa diklom. Trademark ko na garo yan, Mr. Complicated o Mr. Turik. Risa man baga sa mga rawitdawit ko. Grabe kadiklom grabe kabrutal.

Kaipuhan ko pa munang hanapon an sadiri ko. Mahorop-horop. Manamit nin bag-ong ekperiyensya. Kukuguson an uniberson. Asin kukuguson an kublit. Hahanapon an sakuyang kaogmahan asin solitude. Siguro duman sana ko maiheheras an totoong serbe kan mga rawitdawit. Lalo pa na naaraman ko na dakulaon palan an obligasyon tang mga poet sa society. I must fix first my self before I can do such.

Dai ako madulag dawa na ngani depressed ako sa pagkamoot. Dakol lang talaga siguro akong nanodan sa experience ko. Tabangan man lugod ako kan Kaglalang. Tabangan lugod nindo ako. Tabang man lugod ako kan sakong musa.

5-9-10

Ipinaskil ni Jusan Misolas sa 1:14 AM 0 (mga) komento  

Tabi,
apo.

An totoo
nahihiling ko sinda,

Tabi,
apo.

tinugon sana kaya
sako kan sakong ama
na likayan sinda.


05-08-10

Ipinaskil ni Jusan Misolas sa 1:12 AM 0 (mga) komento  

Dai ko pa kayang magtula. Dai ko pa kayang mahiling an saindong mga lawog na pano nin pagduduwa, kun ano an magayon asin makanos. kun an rawitdawit daw buhay sa puso, o gadan hale sa karaw nin ribong na alintak. Dangoga an berso katood, na paulit-ulit na pigtutula kan saimong daghan. Asin ika mauungis sa saindang pinagigibohan. Hilnga an lawog kan saimong kataid. Asin mahihiling an haloy mo nang dai nahihiling.


5-5-10

Ipinaskil ni Jusan Misolas sa 1:19 AM 0 (mga) komento