Oda sa nawarang pagkamoot...
sa rawitdawit na ini an mga memorya asin pagmati
na dai ko aram kun gadan na o naghahalat-halat sanang
mapurisaw, mga pagmati na dai pa sana naghahaloy
daing ontok na pigbatok an nagtotorogtorog kong kalag
asin piglamos an sakong pagmansay nin mga luha
na dawa ako dai aram kun sain nagharali asin kun sain mapasiring,
kun papanong sa mga bangging idto biglang nagsilyab
an bulan asin natamongan nin dai masayod na kamunduan
asin kun papano an mga bituon garo ako pighiling
hale sa harayo, dai ontok na pigtangisan. Muya ko nang magadan
kun aram mo lang, ipaatong an sakong hawak sa mamundong
sulog kan salog kaibahan kan pagmati kong dai mabunyagan
o kun dai italbong sa nagagaratak nang daga sa kaumahan.
Habo ta ka nang kamotan siring na habo ko na, asin kun
tano ako naghabo, iyo ta namomotan ta ka nin orog
sa sakong buhay, asin dawa pa habo ko na pirit man giraray
pigkukurubkutob kan sakong daghan an daing sagkod na
pagkamoot ko saimo. Haen na baya an mga bangging idto
na pirit kong piglingawan? Asin ta daw nagimata na sana
akong mayo na an silyab kan bulan? Ta daw pirit pang pighahanap
an mga pagmati na kaidto ngani muya ko nang paanodon
sa mamundong sulog kan salog, garo sarong bangungot na
muya ko nang dulagan? Nasain na baya an lanit na dara
kan pagkapungaw ko saimo? Nasain na baya an kamunduan
na sakong nagin kaolayaw mantang ika sakong kinamotan?
Ta daw ngunian pirit kong pang pigkakalot asin pigrururip an
pagkamoot na minsan ngani pirit kong nang pigpaanod asin pigtalbong
sa kawaran? Nasain na daw an mga luha asin hibion na nagpapabilog
sa dai ko matapos-tapos na rawitdawit? Baad pigpalid na kan
duros sa harayong lugar tanganing dai ko na mahiling o pigkaon na
kan sarong dakulang aliwowos asin pigdara sa kairaroman kan dagat o
pighalon na kan daga o pig-ikit kan sarong masusuyaon na diyos na pagal
nang magdangog kan sakong mga hibi. Dai man lugod sinda
sala sa paggibo ninda kaidto, dai man lugod sinda magbasol
sa bandang huri. Pangadyi ko lang na dai na mag-abot an aldaw
na magtakig an daga, luguson kan dagat an baybayon, mabua
an paros, asin magaba an kalangitan. Habo ko nang may maraot pa.
Habo ko nang may makol'gan pa. Kontento na ako na sa laog
nin halawig na panahon namotan ta ka. Asin nunca dai ako nagbabasol
na naglaog ka sa sakong buhay, dawa duros man ngani sana.
Mayo na daw talaga an pagkamoot
sa sakong daghan na minsan nagsumpay sa sakong buhay asin nagpatud
man sana kaini?
Dai ko na dapat ini pighahapot pa, tibaad
mayo na talaga.
Lugod lingaw ko na. Lugod...
...dai pa.
6-4-10
*Oda: sarong awit bakong sarong porma nin rawitdawit..
Mag-post ng isang Komento